Herritarrak: “Epaiketa bertan behera gera dadila”

---

Gontzal Landa Herbias / 2010eko otsailak 3, asteazkena

Aramaioarrek aukeratutako alkatea (Asier Agirre) epaitua izango da hurrengo astean. Horren aurrean, aramaioar ugarik bat egin dute gaur arratsaldean, herriko frontoian, euren ordezkari publiko garrantzitsuenari publikoki babesa emateko.

AHTa Aramaion eragin zuzena izaten ari da, egun hauetan inoiz baino argiago ikusten ari garen bezala. Arazo horiek aurreikusita, hainbat aramaioarrek euren alkateari eskatu zioten erreferendum bat antolatzeko laguntza eman zezala.

Herri-galdeketa hura egin egin zen, eta aramaioarren gehiengo zabala AHTaren aurka agertu ohi da.

Hori guztiori ez zen batzuen gustuko izan, eta Arabako Probintzia Auzitegiko fiskalak, Estatuko Abokatuaren bultzadaz, eskatu egiten du alkatearen aurka 9 urteko inhabilitazioa eta 1.800 euroko isuna.

Baina noiz piztu zen afera judiziala?: 2006-ko azaroan 685 aramaioarrek (hau da, erroldatuta zeudenen erdia baino gehiagok) eta hainbat auzo-alkatek, elkarteak, kirol-taldek, kultura-taldek eta norbanakok eskatu egin zioten Udalari AHTaren gaineko iritzia galdetu ziezaiela aramaioarrei.

Udalak aho batez onartu zuen erreferenduma egitea. Alabaina, Estatuko abokatuak bultzatuta, Arabako Probintzia Auzitegiak debekatu egin zuen herri kontsulta. Ezinezkoa izan zen erreferenduma egitea.

 

 

Herritarrek, baina, ez zuten amore eman, eta 2007ko udal-hauteskundeen ostean, herritarrek eurek antolatu zuten erreferendumaren prozedura. Eta eurek egin zuten, hainbat elkarte eta talderen laguntzaz, 2007ko irailaren 28, 29 eta 30ean.

Estatuko Abokatuak berriro jo zuen kontra, hain zuzen, galdeketa bezala kontsideratu zuenaren kontra. Epaileak berriro debekatu zuen, baina ezinezkoa zutenez herriaren aurka egin, alkatearen aurka jo zuten.

Fiskalak aurkeztutako froga nagusia da alkateak egun horietako batean udaletxeko ateak ireki izana. “Horretan bakarrik laburbildu daiteke akusazio guztia” salatu dute gaurko prentsaurrekoan Epaiketaren Kontrako Herri Ekimeneko ordezkariek.

Ildo horretan, irmoki adierazi duten gisa, “herritarren iritzia jakitea ez da delitua. Guztiz kontrakoa, herriari hitza ematea udalen funtzionamendu demokratikoan sakontzeko ariketa da”.

Arrazoi horiengatik, aramaioarren gehiengo zabalak eskatzen du “bidegabekeriari amaiera ematea eta prozedura judiziala bertan behera uztea”. Eskaera horixe egin dute Euskal Herriko udaletxe batzuek (Arrasateko plenoak gaur bozkatuko du mozio bat gai horren inguruan).

Aramaioarrek, arrasatearrek eta bestelako herritarrek horixe bera eskatuko dute publikoki kontzentrazioan, epaiketaren bezperan (otsailak 9), arratsaldeko 19:00etan, Aramaioko Herriko Plazan.